Гатине-Анжу
Гатинеи-Анжу рыҩны (афр. Maison de Gâtinais-Anjou) — мамзаргьы де Шато-Лондон рыҩны (афр. Maison de Château-Landon) — ибеиоу францызтәи ҭаацәароуп, урҭ рхаҭарнакцәа ракәын Анжу, Мен, Тур, иара убас Нормандиеи Британиеи ргерцегцәа. Ингелгерингцәа рыҩны еицны, Гатинет-Анжу рыҩны лассы-лассы еидҵоуп Анжу Актәи Аҩны ҳәа (францызла: Première maison d'Anjou)[1]. XII-тәи ашәышықәсазы, аҩны ҩ-хәҭакны еиҟәшеит - аиҳабыи, Плантагенетцәа рдинастиа ҳәа еиҳа еицырдыруаз, урҭ рхаҭарнакцәа Англиа акралцәа ракәын, аиҵбыи, рхаҭарнакцәа Иерусалимтәи Акралраҿы аҳра руан.
Гатине-Анжу
[аредакциазура | акод аредакциазура]Анаҩстәи ашьҭрақәа рыла, рхыбаҩ Бушар иакәын, уи Гатине аграф, Жоффруа II Ферреоль (д. 1043/1045) иаб. Аха раԥхьатәи ахыҵхырҭақәа рҿы Бушар зыхьӡыз Гатинаи аграф иаҳасабла ихьӡ ҳәаӡам, иахьатәи аҵарауаа Бушар абжьаратәи аамҭақәа рзы иҟаз ашьҭраҭҵааҩцәа иҟарҵаз алегенда ҳәа ирыԥхьаӡоит. Ииашаҵәҟьаны, Жоффруа II иаб Гуго џьу Перш иакәын, уи аграф Фулкуа џьу Перш иԥеиҵбы иакәын. Гуго ԥҳәысс дигеит Обри II де Макон иԥҳа Беатрис, Жоффруа I, Гатинетәи аграф иԥҳәысеиба, уи абзоурала иԥа Жоффруа Гатине ҭынхас дҟалеит, аграф Обри Абӷаџьыҟә данԥсы ашьҭахь. Ари аҭаацәалазаара шьақәдыргылеит 1028 шықәсазы лаҵарамза 26 азы иҟаҵаз акт ала, уи рнапы аҵарҩит Обри имаҳә, Гатине аграф Гуго, иара убасгьы Парижтәи аԥсқәабаз Франкон. Гуго, аграфцәа изхьыԥшыз Блуа аҭаацәараҿ диит, у аамҭазы Гатине аграфцәа рхаҭа Капетингцәа рҳьыԥшцәа ракәын.
Аҭоурых
[аредакциазура | акод аредакциазура]Жоффруа II Ферреол (д. 1043/1045) иашьа гәакьа Обри данԥсы ашьҭахь 1028/1030 азы, Гатине аграфс дҟалеит. Анжуитәи аграф Жоффрои II Мартел иаҳәшьа Ирменгарда дицынхара иабзоураны, Жоффрои Ферреол Анжуитәи аграфцәа дырҩызахеит. Иԥа еиҳабы, Жоффруа III Аԥаҵа зҿоу (1040-1096/1097), иаб иҭыԥан иҟаз, иара убасгьы Анжуи Тури аграфрақәа ҭынхас иоуит, 1060 шықәсазы иабшьа данԥсы ашьҭахь, аха Мен аграфра анапхгара аиқәырхара илымшеит, избанзар Нормандиатәи агерцог, Вилгелм, ари аграфра инапаҿы иааигеит.
Аха 1067 ашықәсазы Жоффруа адинмаҵзыҩра даҿагылеит, уи азы далырцеит, иашьеиҵбы Фулк IV Решин дықәгылеит (1043—1109), иаб иԥсра ашьҭахь иоуит Сентож, уи 1061 ашықәсазы, импыҵихит агерцог Аквитаниатәи Гилом VIII, насгьы асиниорра Виие. Уи иахҟьаны, Жоффруа дырбаандыҩыртәит, анаҩс 1068 азы Фулк иашьа дықәигеит, иҭыԥ аанкыланы, иԥсы ҭанаҵы абахҭаҿы дҭан. Францызтә акрал Филипп I ититул азхаҵаразы, Фулк акрал инапы ианиҵеит аграфра Гатине.
Фулк IV имчра арӷәӷәара иҿагылаз ихьыԥшцәа рырҭынчразы иҽазишәеит, иара убасгьы 1066 ашықәсазы Англиа акралс иҟалаз Вилгелм Аиааирага диҿагыларц азы аҩызцәа рыԥшааразы. Иаҳра анҵәамҭазы, иҿагылаз иԥаеиҳаб Жоффрук IV Мартел (1066 шықәсазы дыԥсит) дицны амчра еицырзеиԥшхар акәхеит.
Фулк IV иԥеиҵбы, Фулк V Ақәыԥш, 1109 ашықәсазы иҭыыԥ иҭынхеит, иаб иҿагылаз ақәгылаҩцәа рҭынчра илшеит, иара убасгьы имазарақәа иазирҳаит, Ментәи аграфра ҭынхас измаз аԥҳәысс дахааигаз абзоурала, аха уи иахҟьаны Англиа акрали Генрихи I Франциа акрали Лиудовики VI рыбжьара иҽанираалоит, анаҩс аҵыхәтәантәи Фулк иган алихит, уи аза асенешал имаҵура иоуит. Анаҩс, иара зныкымкәа Фландриатәи аграфраҿы иҟаз аҭынхатә аимакқәа дрылахәын. 1128 ашықәсазы Фулк илшеит иԥа еиҳабы Жоффруа V Аԥшӡа, Англиа акрал Генрих I иԥҳа, ԥҳәысс дигара илшеит, уи аҭаацәалазаара абзоурала, анаҩс Жоффруа Нормандиа иоуит, насгьы иԥа еиҳабы Генрих (ԥхьаҟатәи Генрих II) Англиа акрал дҟалеит, насгьы Англиаҿ, Плантагенетцәа рдинастиа ршьаҭаркҩы иакәны дҟалеит.
1129 азы Фулк V Анжу аграфра иԥа Жоффруа V ииҭеит, иара ихаҭа Иерусалимтәи акрал Болдуин II иԥҳа, Мелисенде ԥҳәысс дигеит, насгьы Иерусалимтәи Акралрахь нхара диасит, уаҟа 1131 азы аҳратә титул иоуит. Аҭаацәалазаара аҟынтәи иааит аҭаацәара Иерусалимтәи аҟәша, уи 1185 ашықәсазы аҳ Болдуин IV Ацәазҩара змоу данԥсы ашьҭахь акралцәа рышьҭраҿы инҵәеит, аҳәса рышьҭраҿы 1206 ашықәсазы акралԥҳәыс Изабелла данԥсы ашьҭахь инҵәеит.
Алитература
[аредакциазура | акод аредакциазура]- Семёнов И. С. Европейские династии: Полный генеалогический справочник / Научный редактор Е. И. Карева, О. Н. Наумов. Вступительная статья О. Н. Наумов. — М.: ООО «Издательство Энциклопедия», ООО «Издательский дом ИНФРА-М», 2006. — 1104 с. — 1000 экз. — ISBN 5-94802-014-2.
- Settipani C.. Les vicomtes de Châteaudun et leurs alliés // Settipani C.; Keats-Rohan, Katharine S. B. Onomastique et Parenté dans l’Occident médiéval. — Oxford: Linacre College, Unit for Prosopographical Research, 2000. — ISBN 1-900934-01-9.
- Saint Phalle, Édouard de. Les comtes de Gâtinais aux Xe et XIe siècle // Settipani C.; Keats-Rohan, Katharine S. B. Onomastique et Parenté dans l’Occident médiéval. — Oxford: Linacre College, Unit for Prosopographical Research, 2000. — P. 230—246. — ISBN 1-900934-01-9.