Аргәын-Коношок, Анна Бида-иԥҳа
Анна Бида-иԥҳа Аргәын-Коношок (аур. Анна Бидовна Аргун-Коношок; хәажәкырамза 8 (21), 1914 ш., Ҟәланырхәа — абҵарамза, 1980 ш., Аҟәа) — Аԥсны актреса, Қырҭтәылеи жәлар рартист (1958).
В. И. Домогаров напхгаҩыс дызмаз раԥхьаӡатәи Аԥсуа театртә студиа даушьҭымҭоуп. Уи лбаҩхатәра амҽхак даара иҭбаан. Ҟазара ҳаракыла иналыгӡон акомедиатә, адраматә, атрагедиатә, иара убас абзиабара-лирикатә жанрқәа ирыҵаркуаз еиуеиԥшым ахаҿсахьақәа.
Аԥсуа сценаҿы А. Аргәын-Коношок қәҿиара дула иаԥылҵаз арольқәа иреиуоуп: Аҭыԥҳа (С. Ҷанба «Кьараз», 1931); Вишневскаиа (А. Островски «Ахашәалахә ҭыԥ», 1932); Назиа (М. Саркисиан «Шәаҳаракыра, агыгшәыгқәа», 1934); Ҳаҭџьа(М. Ақаҩба «Инаԥҳа Кьагәа», 1935); Аихацәҩы иԥҳәыс (Н. Гоголь «Аревизор», 1931); Ҳалила (С. Шьаншиашьвили «Анзор», 1935); Хьыкәыҷ (С. Ҷанба «Сеидыҟ», 1936); Елена (А. Давурин «Волковаа рҭаацәара», 1936); Дездемона(У. Шеқспир «Отелло», 1941, 1957); Коринкина (А. Островски «Харада ахара зду», 1944, 1953); Мзиа (Н. Миқаа «Актриса лыбзиабара», 1946); Шабунина (Б. Лаврениов «Амшын ихыу рзы», 1947); Мильфорд ( Ф. Шиллер «Агьангьашреи абзиабареи», 1947); Гиульчохра (У. Гаџьибеков «Аршин мал алан», 1949); Манана (Н. Миқааи Г. Абашиӡеи «Адунеи аԥшшәқәа», 1950); Мадинаҭ (А. Токаев «Аԥҳәысҳәаҩцәа», 1951); Зина (Г. Мухҭаров «Аҭаацәа раҳаҭыр», 1952); Мирандолина (К. Гольдони «Асасааирҭа аԥшәмаԥҳәыс», 1952); Гаиане (И. Мосашьвили «Иӡаарҟәрылоу ахаҳәқәа», 1953);Даурхан (Г. Габуниа «Амра гылаанӡа», 1953); Наташа (А. Макаионок «Агәаҵәа иамоу ахаҳәқәа», 1954); Надежда (М. Горки «Аҵыхәтәантәиқәа», 1954); Гәында (Шә. Ԥачалиа «Гәында», 1955, Оқсана (А. Корнеичук «Аескадра аҭахара», 1955); Саида (Г. Гәлиа «Асас еиқәаҵәақәа», 1956); Шьазина (И. Папасқьыр «Ҭемыр», 1956); Рукаиа (А. Сумбатов-Иужин «Аԥсахра», 1956); Кама (А. Лашәриа «Ахаԥыц хьаа», 1956); Назиа (Хә. Џьапуа, А. Хәаҭланӡиа «Аца иҭоу аҳәынаԥ», 1957); Маша (Н. Погодин «Кремльтәи акурантқәа», 1957); Коррадо иԥҳәыс (П. Џьакоматти «Ацәгьауцәа рҭаацәара», 1958); Фаҭма(А. Лагәлаа «Ашамҭазы», 1960); Жукова (Шә. Ԥачалиа «Ԥсра зқәым», 1960); Гәлиза (Шь. Басариа «Ажәҩан цқьа», 1961); Мальчук (М. Чамагәуа «Иван-Аԥсуа», 1963); Аиҭар (А. Лагәлаа «Абрыскьыл», 1966); Малахова (Д. Павлова «Аламыс», 1966); Клеиа (Г. Фигьеиредо «Езоп», 1966); Ааԥын-ԥшӡа (А. Островски «Асҭыԥҳа», 1969); Мариам ( А. Гогәуа «Иԥсаху амш», 1969); Аҳкәажә (Б. Шьынқәба «Ахрашәа», 1971); Оливарес (Ф. Шиллер «Дон Карлос», 1971); Сашико (Н. Думбаӡе «Бысцәымшәан, сан!», 1972); Аԥҭека иҵагылоу (И. Буковчан «Арбаӷь ҿнаҭаанӡа», 1974), Пипка (Шә. Ԥачалиа «Зегьы злоу Мазлоу», 1975) уҳәа убас егьырҭгьы.
А. А. лбаҩхатәреи, лыԥшӡареи, леинаалашьеи ирыбзоураны аԥсуа сцена зырлашо аҳкәажә ҳәа илышьҭан. Уи ауаажәларратә усзурақәагьы дрылахәын. Аԥсны Иреиҳаӡоу асовет 4-тәи ааԥхьара аҿы депутатс дыҟан.
Ахархәара змоу алитература
[аредакциазура | акод аредакциазура]- Аргун Алексей, История абхазского театра = Аԥсуа театр аҭоурых, Алашара, Аҟәа, 1978. — ад. 455. [1]