Џьениа, Чынчор Кәасҭа-иԥа

Чынчор Кәасҭа-иԥа Џьениа (мшаԥымза 4, 1930 ш., ақыҭа Аҷандара, Гәдоуҭа араион — мшаԥымза 14, 2014 ш., Аҟәа) — Аԥсны жәлар рартист.

Абиографиа

Чынчор Џьениа ибаҩхатәра ааԥшит адраматә ҟазара еиуеиԥшым ажанрқәа рҟны: атрагедиа инаркны акомедиа аҿынӡа; жәлар репос инаркны аводевиль аҿынӡа. Хыԥхьаӡара рацәала арольқәа еиуеиԥшым аспектакльқәа рҿы дыхәмархьеит. Аха еиҳарак Чынчор Џьениа ибаҩхатәра аарԥшын аԥсуа шҟәыҩҩцәа - Б. Шьынқәба, Ш. Ҷкадуа убас егьырҭгьы рҩымҭақәа рыла иааирԥшуаз ахаҿсахьақәа рҿы. Акыр хаҿсахьа лашақәа аԥиҵахьан Чынчор Џьениа адунеитәии аурыс литературеи рыклассикцәа – Шекспир, Кальдерон, Ердман, Горьки уҳәа уб. егьырҭгьы рпиесақәа рыла иқәыргылаз аспектакльқәа рҿы. С. Ҷанба ихьӡ зху Аԥсуа ҳәынҭқарратә театр аҿы аус иуан 60 шықәса инареиҳаны. Иара амилаҭҭә сатиреи аиумори ржанр ашьақәгылараҿы илагала рацәоуп, аус иуан еицырдыруаз асатиреи аиумори ртеатр “Чарирама” аколлектив аҿы. Ч.К. Џьениа акыр сахьаркыратә фильмқәа рҿы иҽҭиххьан.

Алитература

• Аргун А. Абхазский театр и фольклор/А. Аргун; Ред. О. Кайдалова, ред. изд-ва Р. Лазарева, худож. Т. Кохреидзе. - Тб.: Хеловнеба, 1986. - 202 с.
• Акрызҵазкуа арыцхәқәа рамзар, Аҟәа, 2015 ш.