Арӡынба, Владислав Григори-иԥа

Аматериал Авикипедиа аҟынтә - зхы иақәиҭу аенциклопедиа
Владислав Арӡынба 10 ҧсарк ашьҭахьтәи аган
Владислав Арӡынба

Владислав Григори-иҧа Арӡынба (лаҵара 14, 1945 Ешыра ақыҭа, Аҧснытәи АССР - хәажәкыра 4 2010 Москва, Урыстәыла) - Аҧсны аҳәынҭқарра раҧхьатәи ахада (1994–2005), Амилаҭтә Фырхаҵа. Иналукааша аҳәынҭқарратә усзуҩы, аҵарауаҩ Владислав Арӡынба диит 1945 шықәса, лаҵара 14 аҽны, Аҟәа араион Ешыра ақыҭан. Иаб - Григори Қьаамын-иҧа Арӡынба Аџьынџьтәылатә еибашьра Дуӡӡа даветеранын, акыраамҭа рҵаҩыс аус иуан. Иан - Надежда Шьаабан- иҧҳа Иазычба, Ешыратәи абжьаратә школ аҿы аус луан усныҟәгаҩыс. Владислав Арӡынба далгеит Ешыратәи абжьаратә школ. 1962-1966 шш. Владислав Арӡынба аҵара иҵон М. Горки ихьӡ зхыз Аҟәатәи арҵаҩратә институт аҭоурыхтә факультет аҿы. 1973-1977 шш. дҭан СССР аҭҵаарадыррақәа ракадемиа иатәу Мрагылараҭҵаара аинститут аҟны иҟоу аспирантура, ихьчоит акандидаттә диссертациа. 1986 ш. ихьчоит адоктортә диссертациа. Аус иуан Мрагылараҭҵаара аинститут . Ажәытәӡатәи Мрагылара аидеологиеи акультуреи аҟәша аиҳабыс. 1988 ш. инаркны 1996 ш. Д. Гәлиа ихьӡ зху Аҧсуаҭҵааратә институт данапхгаҩуп. Авторс дрымоуп 40 инареиҳаны аҭҵаарадырратә усумҭақәа. 1998 ш. Владислав Арӡынба далырхуеит. Аҧсны Иреиҳаӡоу Асовет адепутатс.1989 ш. - СССР жәлар рдепутатс. 1990 ш. В. Арӡынба далырхуеит Аҧсны Иреиҳаӡоу Асовет Ахантәаҩыс. Аҧсны . Аџьынџьтәылатә еибашьраан напхгара аиҭон Атәылахьчаразы аҳәынҭқарратә хеилак, аамҭакала Аҧсны архәҭақәа Рыдҵаҟаҵаҩ Хадас дыҟан. 1994 шықәса абҵара 26 рзы Арӡынба далырхуеит Аҧсны Аҳәынҭқарра Ахадас. 1999 шықәса жьҭаара 3 рзы уи жәлары зегьы рыбжьыҭирала ҩынтәны деиҭалырхуеит, Хадас дыҟан ажьырныҳәа 2005 ш. аҟынӡа. 2010 шықәса хәажәкыра 4 рзы Владислав Арӡынба иҧсҭазаара далҵит. Владислав Арӡынба еицырдыруа ҵарауаҩын, профессорын, Аҧсны аҭҵаарадыррақәа ракадемиа академик ҳәа ахьӡ ҳаракы ныҟәигон, Адыгатәи жәларбжьаратәи аҭҵаарадыррақәа ракадемиа далахәылаҩын. Ианашьан В. И. Вернадски ихьӡ зху апремиа. Владислав Арӡынба ихҵан Аҧсны Афырхаҵа ҳәа ахьӡ ҳаракы. Ианашьан "Ахьӡ-Аҧша" аорден актәи аҩаӡара.